ភ្នំពេញ៖ នាយករដ្ឋមន្ត្រីចិន លោក លី ឃើជាំង នឹងចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដែលនឹងប្រព្រឹត្តទៅនៅរាជធានីភ្នំពេញសប្តាហ៍ក្រោយ។

យោងតាមការចុះផ្សាយរបស់គណបក្សប្រជាជនកម្ពុជាឱ្យដឹងថា ស្ថានទូតនៃសាធារណៈរដ្ឋប្រជាមានិតចិនប្រចាំព្រះរាជាណាចក្រកម្ពុជា សូមសម្តែងការកោតសរសើរចំពោះក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងមានកិត្តិយសក្នុងការជូនដំណឹង និងស្នើសុំជូនចំពោះការរៀបចំសារព័ត៌មានខាងក្រោមទាក់ទងនឹងដំណើរទស្សនកិច្ចនាពេលខាងមុខរបស់នាយករដ្ឋមន្ត្រី Li Keqiang ចាប់ពីថ្ងៃទី៨ ដល់ថ្ងៃទី១៣ ខែវិច្ឆិកា។

ព័ត៌មានលម្អិតនៃកម្មវិធីរបស់លោកក្នុងអំឡុងពេលស្នាក់នៅប្រទេសកម្ពុជា មិនទាន់ត្រូវបានចេញផ្សាយជាផ្លូវការនៅឡើយទេ ប៉ុន្តែនាយករដ្ឋមន្ត្រី សម្តេចតេជោ ហ៊ុន សែន បានមានប្រសាសន៍ថាលោក លី ឃើជាំង នឹងមកបំពេញទស្សនកិច្ចជាផ្លូវការនៅកម្ពុជាក្នុងឱកាសនោះសម្ដេចនឹងជួបពិភាក្សាការងារនៅថ្ងៃទី៩ វិច្ឆិកា ជាមួយលោកផងដែរ។ នេះបើតាមការបញ្ជាក់ដោយសម្ដេចតេជោក្នុងពិធីប្រគល់សញ្ញាបត្រ ដល់សាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច។

សម្តេចតេជោ ហ៊ុន សែន មានប្រសាសន៍ថា លោក លី ឃើជាំង នឹងស្ថិតក្នុងចំណោមប្រមុខរដ្ឋាភិបាល/រដ្ឋ ដើម្បីមកបំពេញទស្សនកិច្ចជាផ្លូវការនៅកម្ពុជាមុនកិច្ចប្រជុំកំពូលអាស៊ាន រួមមាននាយករដ្ឋមន្ត្រីវៀតណាម ស៊ុលតង់ប្រ៊ុយណេ៕